நேற்று கிழக்குப் பதிப்பகத்தின் வெளியீடாக திரு.மருதன் அவர்கள் எழுதிய “சே குவேரா” படிக்கும் வாய்ப்பு கிடைத்தது. சே வைப் பற்றி முன்னமே அறிந்திருந்தாலும் இந்த புத்தகத்தின் வாயிலாக என் நினைவுகளை புதுப்பித்துக் கொண்டேன்("ஒரு காலத்தில்" என்று ஆரம்பித்தால் வயதானவனாக காட்டப் படுவோம் ஆதலால் அப்படி ஆரம்பிக்கவில்லை... சாரு நிவேதிதாவிடம் கற்றுக் கொண்டது ;-)...).
சே வின் வாழ்க்கை வரலாற்றை திரு.மருதன் கடற்கரையில் இருந்து ஆரம்பிக்கிறார். ஆஸ்துமா நோய் அவரை சிறு பிள்ளையில் இருந்து எப்படி பாதித்தது என்பதை முதல் அத்தியாயத்தில் பகர்கிறார். முதல் அல்லது இரண்டாவது அத்தியாயத்தில் ஒரு சின்ன குறை.... எர்னஸ்டோ எப்படி சே வாகிறார் என்பதை சிறு குறிப்பாக எழுதியிருக்கலாம்... ;-).. அடுத்தடுத்த அத்தியாயங்களில் அதிரடி காட்டுகிறார். சே வின் முதல் காதல்... முதல் மோட்டார் சைக்கிள் பயணம்... மருத்துவப் படிப்பு இவற்றின் ஊடே அவரின் உலகப் பார்வை.. அமெரிக்கா ஏகாதிபத்தயத்தினை வெறுக்கும், எதிர்க்கும் துணிவு... இப்படி நம்மை அவரின் வாழ்க்கையுடன் இணைந்து பயணிக்க வைக்கிறார். பிடலுடனான சந்திப்பிற்குப் பிறகு ஆசிரியர் பிடலுக்கு முக்கியத்துவம் கொடுப்பது போல் எழுதியிருக்கிறார்.
க்யூபாவில் பிடல் அடைந்த முதல் தோல்வி.. பிடலின் கைது... விடுதலை அடைந்த பின்னர்... மெக்ஸிக்கோ பயணம்... சே வுடனான சந்திப்பு... கொரில்லா பயிற்சி... பிடலுக்கு சே வின் மேல் ஏற்படும் நம்பிக்கை... க்ராண்ட்மா படகில் க்யூபாவிற்குப் பயணம்... சதுப்பு நிலக் காடுகளில் அடையும் துயரம்... ராணவத்தை எதிர்த்து முதல் வெற்றி... அதன் பின் ஹவானாவைக் கைப்பற்றுதல்... க்யூபா மக்களை அரசுக்கு எதிராக ஒன்று சேர்த்து வெற்றி பெறுதல்... புதிய அரசை கட்டமைக்க உதவுதல் ... க்யூபாவை விட்டு வெளியேறி காங்கோவில் கொரில்லா படையை நிர்மாணிக்க முயலுதல்... அதில் தோல்வி அடைந்து பிடலின் கோரிக்கைக்கு ஏற்ப பொலியாவை அடைதல்... பொலிவிய ராணுவத்தால் சிறை பிடிக்கப்பட்டு கொல்லப்படுதல்.... இப்படியாக சே வின் வாழ்க்கை முடிவுக்கு வருகிறது.
சே வின் அமெரிக்க ஏகாதிபத்திய எதிர்ப்பை நன்றாகவே நம் கண் முன் கொண்டு வந்து நிறுத்திகிறார். வாழைப்பழ கம்பெனி, நிலங்களை சொற்ப டாலருக்கு வாங்கி ஏழைகளின் வயிற்றில் அடித்திருப்பதை கண்டு கொதித்து எழும் சே... அரசு அமைக்கும் பொழுது... வாங்கிய விலைக்கு திரும்ப நிலத்தை ஒப்படைக்க வேண்டும் என்பது வாழைப்பழ கம்பெனிக்கு சரியான ஆப்பு... இப்படியாக அமெரிக்காவின் எதிர்ப்பை சம்பாதித்துக் கொண்டார்... அமெரிக்காவும் க்யூபாவின் மேல் பொருளாதாரத் தடை முதற் கொண்டு எல்லாவற்றையும் பிரயோகித்து பார்த்து முகத்தில் கரியை பூசிக் கொண்டது...
தனது வாழ்நாளின் பெரும் பகுதியை ஆதரவற்ற மக்களுக்காக போராடுவதிலேயே செலவிட்டார். ஆயுத பலமே அநீதியை வேரறுக்கும் என்று நம்பிக்கை கொண்டிருந்தாலும் மக்கள் பணத்தில் ஆயுதக் குவிப்பை அறவே வெறுக்கிறார்.. மிகப் பெரிய பதவி வகித்த போதும் மக்களோடு மக்களாகவே வாழ்ந்திருக்கிறார்... அரசு வாகனத்தை சிக்கனமாக உபயோகித்திருக்கிறார்... தனக்கென்று சலுகைகள் எதையும் அவர் உபயோகித்தது இல்லை... ஆஸ்துமா அவரை படாத பாடு படுத்தினாலும் தனது மன உறுதியால் எல்லாவற்றையும் தகர்த்து எறிந்து இருக்கிறார்...
சே நினைத்திருந்தால் க்யூபாவிலேயே அவர் தனது வாழ்க்கையை அமைத்துக் கொண்டு இருந்திருக்கலாம்... க்யூபாவிற்கு கிடைத்த வெற்றி ... லத்தின் அமெரிக்கா முழுவதும் எதிரொலிக்க வேண்டும் என்று கனவு கண்டார்... கனவை நினைவாக்க முயலும் போது ஒரு போர் வீரனாகவே கொல்லப் பட்டார்... க்யூபர்களைப் போல் காங்கோலியர்களும் பொலிவியர்களும் இல்லாதது சே வின் தோல்விக்கு முதல் காரணமாக இருக்கலாம் என்பது எனது கருத்து...!
சே வைப் பற்றி நினைக்கும் பொழுதெல்லாம் கீழ்க்கண்டவைகள் ஞாபகத்திற்கு வருவதை தடுக்க முடியவில்லை...
“உலகில் எங்கோ ஒரு மூலையில் நடக்கும் அநியாயத்தைக் கண்டு உங்களின் மனம் கொதித்தால் நாம் இருவரும் தோழர்களே...!”
“இந்த இருபதாம் நூற்றாண்டின் மிகச் சிறிய போராளியை நினைவில் கொள்ளுங்கள்...”
“நீ எதற்காக வந்திருக்கிறாய் என்பது எனக்குத் தெரியும்... நீ சுடப் போவது ஒரு மனிதனைத் தான்... சுடு...”
இன்னும் எழுத வேண்டும் என்று எனக்கு ஆசையாக இருக்கிறது... மிகச் சுருக்கமாக சொல்லப் போனால்....
ஒரு சே அழிக்கப்பட்டிருக்கலாம்... அவரது கொள்கைகள் இன்றளவும் வாழ்ந்து கொண்டு தான் இருக்கின்றன... சே ஒரு வாழும் வரலாறு...!
நூல்; சே குவேரா... வேண்டும் விடுதலை!
விலை; ரூ.70
ஆசிரியர்; திரு.மருதன்.
பதிப்பகம்; கிழக்குப் பதிப்பகம்.
பி.கு; இந்த புத்தகத்தினை படிக்கும் வாய்ப்பை ஏற்படுத்திக் கொடுத்த சகோதரியாருக்கு எனது நன்றிகள் உரித்தாகுக...!
